Bere ibilbidean zehar, Poyok arte unibertso propioa eraiki du, zinema, bideoa, argazkigintza edo instalazioa bezalako lengoaia eta euskarriak uztartuz. Bere lanek sarritan zalantzan jartzen dituzte errealitatearen eta fikzioaren, zientziaren eta mitoaren edo iraganaren eta orainaren arteko mugak, eta boterearen mekanismoei, kontrol sozialari eta historia garaikideari buruzko gogoeta pizten duten narrazio bisualak sortzen dituzte.

Anónima izenburuak ondare kolektiboaren eta jakintza herrikoiaren ideiari egiten dio erreferentzia, eta hari horren bidez antolatzen da erakusketa. Bertan, artistaren ikerketa eta proiektu nagusi batzuk aurkezten dira, memoria kolektiboaren eta identitatearen eraikuntzari buruzko galderak planteatzen dituztenak.

Lan horien artean nabarmentzekoa da Cadáveres exquisitos proiektua: egunkarietako ehunka nekrologiatan egindako esku-hartzeen bidez, memoria pertsonal eta kolektiboaren iruditeria aztertzen duen lana. Halaber, Izaro, Expediente: Túnel de la Engaña edo Gabinetes pedagógicos bezalako ikerketak ere ageri dira; horietan dokumentazio historikoa eta artxibo materiala oinarri hartuta, instalazio multidiziplinarrak sortzen ditu artistak bideoaren, eskulturaren eta argazkiaren bidez.

Erakusketa hau Txuspo Poyoren lanari eskainitako orain arteko erakusketarik zabal eta sakonena da. Artistaren sormen-bidea eta lan-metodologia ezagutzeko aukera emateaz gain, gaur egungo arte garaikidean eta kultura globalean eztabaida garrantzitsu bihurtu diren gai askoren aurrekariak nola landu dituen erakusten du.

Jarduera osagarriak eta azalpen-bisitak

Erakusketaren harira, “Hondakina, oszilazioa, lekualdaketa” izeneko solasaldia antolatuko da martxoaren 11n. Fernando Bayón eta Jaime Cuenca filosofoek Txuspo Poyoren lanaren inguruko hiru kontzeptu nagusi aztertuko dituzte, erakusketako piezen fragmentuak, testuen irakurketak eta publikoaren parte-hartzea uztartuz.

Horrez gain, azalpen-bisitak egingo dira ostegunero 18:30ean, martxoaren 5etik aurrera. Hogeita hamar minutuko ibilbide gidatu hauek erakusketa testuinguruan kokatzeko pentsatuta daude, eta euskaraz zein gaztelaniaz eskainiko dira. Sarrera 3 eurokoa da —doakoa AZ txartela dutenentzat— eta bisita bakoitzean gehienez 25 lagunek parte hartu ahal izango dute.