Euskararen Etxean aurkeztu dute aurtengo egitaraua. Loraldia ez da programazio multzo hutsa: euskarazko sorkuntza garaikideari ikusgarritasuna emateko eta publiko berriak —euskaldunak zein ez-euskaldunak— aktibatzeko estrategia kulturala da, berrikuntza, integrazioa eta zaintza uztartzen dituena.

Aurtengo edizioak Bilboko espazio esanguratsuak lotuko ditu: Arriaga Antzokia, Guggenheim Bilbao Museoa, Azkuna Zentroa, Euskalduna Bilbao, Bidebarrieta Liburutegia eta beste hainbat gune, baita Arraitz mendia ere.

Musika, literatura, bertsolaritza, dantza, antzerkia, zinema eta esperientzia murgiltzaileak gurutzatuko dira formatu berezietan: diziplinen arteko elkarrizketak eta publikoari “beste modu batean” hunkitzeko proposamenak izango dira nagusi.

Ekoizpen propioak, Loraldiaren DNA

Loraldia ez da soilik programatzailea: sortu eta ekoitzi ere egiten du. 2026ko edizioan bost formatu propio nabarmentzen dira:

IKIMILIKILIKLIK Vol.2, duela 50 urteko abangoardiaren espiritua gaurko lengoaia eszenikoetara ekartzen duen produkzio berria. Musika, poesia, dramaturgia, ikus-entzunezkoak eta txalaparta uztartuko ditu Arriaga Antzokian, aurretik Ikusletegia saio batekin.

APPA MAURIZIA, Sormen Digitala Bekaren emaitza, instalazio performatibo murgiltzaile eta kolektiboa da: 8D audioan garatutako fikzio sonoro baten bidez, euskal folklorea berrirakurri eta berresanahitzeko esperientzia proposatzen du Azkuna Zentroan.

AHAZTU NIREKIN formatuak etorkizunari idatzitako testu baten estreinaldia ekarriko du Guggenheimen, zuzeneko musikaz eta bat-bateko bertsoz lagunduta.

Halaber, BOZAK (emakume sortzaileak eta talentu berriak ardatz) eta GOROLDIORIK EZ (III) (hiria eta natura lotzen dituen memoria-ibilbidea Arraitz mendira) izango dira aurtengo mugarri propioak.

Komunitatea erdigunean: Lorazainak

Loraldiaren komunitate-sarea, 4.600 lagunetik gorako Lorazainak, jaialdiaren motorra da. Aurten, MAITASUNA EZ DA NAHIKOA ekitaldian ospatuko da Lorazain Eguna, komunitateari eskerrak emateko eta euskarazko kultur kontsumoa sustatzeko.

Hamabigarren edizio honek, beraz, Bilbo berriz ere plaza bihurtuko du: sorkuntzarako, topaketarako eta euskarazko kulturaren etorkizuna elkarrekin irudikatzeko plaza. Sarrerak jada eskuragarri daude jaialdiaren webgunean.