 |
|
2008an Pekinen sortu zuten Tao Ye koreografoak, Duan Ni sortzaileak eta Wang Hao ekoizleak, eta ordutik TAO Dance Theater nazioartean aitortza handiena duten Txinako dantza garaikideko konpainietako bat bihurtu da.
Bere ibilbidean munduko agertoki eta jaialdi garrantzitsuenetako batzuetan aritu da, besteak beste New Yorkeko Lincoln Center Art Festivalen, Londresko Sadler’s Wellsen, Sydneyko Operan eta Parisko Théâtre de la Villen. Gainera, nazioarteko sari ugari jaso ditu, tartean Veneziako Bienaleko Zilarrezko Lehoia 2023an.
Konpainiaren buru Tao Ye dago, Txinako dantza garaikidearen figura nabarmenetako bat. Bere lanak gorputzaren adierazpen-aukerak etengabe ikertzen ditu, eta ikerketa horretatik sortu du Mugimendu Zirkularraren Sistema izeneko gorputz-teknika, konpainiaren nortasun artistikoaren ezaugarri nagusietako bat.
13 eta 14 lanak Numerical Series proiektuaren parte dira. 2008an abiatutako serie koreografiko honetan, sorkuntza bakoitza zenbaki batekin identifikatzen da. Estetika minimalistaren bidez, lanek bigarren mailako elementuak baztertzen dituzte arreta guztia gorputzean, erritmoan eta interpreteen arteko harremanetan jartzeko.
13 lanean, hamahiru dantzarik elkarreragin-eredu konplexuak sortzen dituzte. Zuritik gris urdinxkara doazen tonuez jantzita, interpreteek talde-egiturak sortu eta desegiten dituzte, jariakortasuna, zehaztasuna eta taldearen etengabeko eraldaketa ardatz dituen piezan.
Obrak Tao Yek Mugimendu Zirkularraren Sistemaren inguruan egindako ikerketa islatzen du, gorputzen arteko loturak muturreraino eramanez eta dantzariek, aldi berean, banako gisa eta organismo kolektibo baten parte gisa jarduteko duten gaitasuna aztertuz.
13 lanaren soiltasun bisualaren aldean, 14 piezak askoz unibertso koloretsuagoa proposatzen du. Duan Nik diseinatutako jantziek protagonismo handia hartzen dute, eta interpreteek geldotasunaren eta mugimenduaren arteko aldaera ugari garatzen dituzte metronomo baten erritmoari jarraituz.
Piezak konpainiak urteetan garatutako ikerketaren zati handi baten gailurra irudikatzen du, baita gorputz-hizkuntzaren gainean lortutako maisutasunaren ospakizuna ere.
Zenbakien hautaketak ere esanahi berezia du. Tao Yeren arabera, 13 eta 14 zenbakien ahoskera txineraz, elkarrekin esanda, zerbaitek bizitza osoan iraun dezala adierazten duen esaera baten antzekoa da fonetikoki.
Koreografoarentzat, gorputza dantzaren tresna izateaz gain, haren funtsa bera ere bada. «Dantza arte-adierazpen gorena da, dantzatzeko erabiltzen dugun materia gu geu garelako», dio Tao Yek.
Bere filosofia ideia zuzen eta argi batean laburbiltzen du: «Gorputza dantza da; dantza gorputza da».
